Dünyanın nüfuzlu ali məktəbləri sırasında yer alan Türkiyənin İhsan Doğramacı adına Bilkənd Universitetinin Bölgə Ölkələri üzrə Kurs Proqramları Direktorluğu artıq 25 ildir ki, türkologiyanın aktual məsələləri, o cümlədən Türkiyə türkcəsinin öyrədilməsi istiqamətində “Hizmet içi yaz eğitim kursları”nı həyata keçirir. 01-19 iyul 2019-cu il tarixlərində baş tutmuş “Türkiye Türkçesi Öğretimi Metot ve Teknikleri Hizmet İçi Eğitim Kursu”na Azərbaycan, İraq, Qazaxıstan, Tatarıstanın müxtəlif universitetlərinin və orta ümumtəhsil məktəblərinin müəllimləri, eləcə də ali məktəb tələbələri daxil olmaqla, ümumilikdə 67 müdavim qatılıb. Kursda Bakı Dövlət Universitetini “Azərbaycan dilinin tətbiqi məsələləri” elmi tədqiqat laboratoriyasının elmi işçisi, fil.f.d. Aynur Məmmədova, “Azərbaycan şifahi xalq ədəbiyyatı” kafedrasının əməkdaşı, dissertant Gülnar Axundova, Filologiya fakültəsinin magistrantı İntizar Əlizadə və III kurs tələbəsi Rəsul Həmidov uğurla təmsil ediblər.
Kursda müdavimlərə türkologiya istiqamətində müxtəlif fənlər: “Xalq ədəbiyyatı”, “Əski türk ədəbiyyatı”, “Yeni türk ədəbiyyatı”, “Qərb ədəbiyyatı”, “Özəl tədris metod və üsulları”, “Yazılı və şifahi nitqdə normanın pozulma halları”, “Dil bilgisi”, “Mətnin oxunması və təhlili”, “Təsirli ünsiyyət”, “Tələffüz qaydaları”, “Yazı qaydaları” və başqa fənlər tədris olunub. Hər gün saat 08:40-dan 15:40-a kimi davam edən dərsləri Türkiyənin tanınmış dilçi və ədəbiyyatşünas alimləri – Rasim Özyürek, Hamza Zülfükar, Hayal Zülfükar, Abide Doğan, Ayşegül Celepoğlu, Saadet Öztürk, İlker Kalender, Yasemin Dinç Kurt, Necati Demir, Armağan Ateşkan, Mine Nihan Doğan, Naciye Ata Yıldız, Nurdane Mumcu, Fatih Kirişçioğlu, Zühal Yüksel, Meltem Kılıç, Ayşen Gençtürk və başqaları aparıb. Dərslərdən sonra tanınmış elm adamları Oya Kerman, Şükrü Haluk Akalın, Muammer Yıldız, Abdurrahman Güzel, Gözde Kerman, Necmiye Şenel Elaldı, Serhat Vergili tərəfindən müxtəlif mövzularda konfranslar keçirilib.
Kursun ilk həftəsinin istirahət günü qonaqların Ankara şəhəri ilə tanışlığı baş tutub. Türkiyə Cümhuriyyətinin qurucusu Mustafa Kamal Atatürkün və Bilkənd Universitetinin qurucusu professor İhsan Doğramacının məzarları ziyarət edilib. “Anıtkabir” və “Təbiət tarixi” muzeyləri ilə tanışlıq da yadda qalan məqamlardan olub. Azərbaycanlı müdavimlər Azərbaycan Xalq Cumhuriyyətinin qurucusu, görkəmli ictimai-siyasi xadim Məhəmməd Əmin Rəsulzadənin məzarını da ziyarət ediblər.
12 iyul tarixində Türk Dil Qurumunun 87-ci ildönümü ilə bağlı tədbirə qatılan müdavimlərə Türkiyə türkcəsi ilə bağlı kitab və jurnallar hədiyyə edilib.
Kursun ikinci həftəsinin istirahət günündə isə Əskişəhər gəzintisi baş tutub. Burada qonaqlar 58 yerli, 10 xarici sənətkarın əsərlərindən ibarət olan “Çağdaş Cam Sanatları Müzesi”, eləcə də məşhur insanların heykəllərinin yer aldığı “Yılmaz Büyükerşen Balmumu Heykeller Müzesi” ilə tanış olub, “Sazova Bilim Sanat və Kültür Parkı”na, “Atlıhan El Sanatları Çarşısı”na səyahət ediblər.
Kursun başa çatmasına bir neçə gün qalmış bütün iştirakçılar test imtahanı veriblər. İmtahanın nəticəsinə görə, BDU təmsilçiləri 50 sualdan 40-dan çoxuna düzgün cavab verməklə yüksək nəticə əldə ediblər. Gülnar Axundova isə ən yüksək balla müdavimlər arasında qrup birincisi olub.
Sonda yay məktəbinin başa çatması və sertifikatların təqdim olunması ilə əlaqədar bağlanış mərasimi keçirilib. Mərasimdə yüksək nəticə göstərmiş müdavimlərə beynəlxalq səviyyəli başarı sertifikatları və məzun bukleti təqdim olunub.
Həmçinin tədbirdə bakalavriat pilləsində təhsil alan müdavimlər adından BDU-nun Filologiya fakültəsinin III kurs tələbəsi Rəsul Həmidovun çıxışı maraqla qarşılanıb. BDU təmsilçiləri adından çıxış edən Gülnar Axundova təşkilatçılara təşəkkürünü bildirib və Universitet rəhbərliyi adından Bilkənd Universitetinin rektorluğuna və professor Rasim Özyürəyə xatirə hədiyyələri təqdim edib.
Kriteri.az